На околу 500 метри источно од селото Бродец, во срцето на Скопска Црна Гора, се наоѓаат водопадите на Тршченскиот Поток – познати како Бродечки Водопади. Ова природно богатство е лесно пристапно и се наоѓа на надморска височина од 950 до 1100 метри, во раскошен шумски амбиент.
Тука се распослани десетина водопади со височина од 2,5 до 5 метри, наредени скалесто и формираат слап. Највпечатливи се шесте водопади наречени Бучало, од кои најгорниот е најголем – висок цели 5 метри.
Најубави се за посета во пролет, кога се топат снеговите и природата расцутува, нудејќи спектакуларен поглед и освежувачко искуство за сите љубители на природата и планинарењето.
