Скопска Црна Гора сè повеќе и повеќе страда од дрвокрадците. Планините кои со векови ја чувале рамнотежата на природата денес стануваат цел на нелегални дрвосечачи, кои не само што уништуваат шумски богатства, туку ја загрозуваат и безбедноста на локалните жители.
Нелегалното сечење станува дневна рутина
Во изминатите месеци, мештаните сведочат за систематско уништување на шумата, дрвата се сечат без дозвола, а товарните возила ноќе се движат со голема брзина низ селските улици, често без светла, без исправни кочници, за да избегнат контрола од полицијата. Таквото беззаконие не само што предизвикува шумска ерозија и ризик од свлечишта, туку претставува и директна опасност за животите на луѓето.
Несреќата што ја разбуди заедницата
Пред одредено време еден инцидент ја потресе населбата Чучер, кога едно младо девојче беше повредено откако возило со нелегален товар управувано од страна на албанските дрвокрадци удри во неа. За среќа, повредите не беа фатални, но гневот меѓу жителите се засили. Како реакција, беа поставени лежечки полицајци на патот Чучер–Блаце, но поради лошата изведба тие станаа нов проблем. Високите бетонски пречки ги оштетуваат возилата на сите граѓани, додека албанските дрвокрадци едноставно ја сменија трасата и сега минуваат преку патот во Бањани.
Безбедноста пред сè
Проблемот не е само во нелегалната сеча, туку и во чувството на немоќ кај луѓето. Секојдневно можеме да ги видиме овие возила како поминуваат со огромна брзина низ улиците на Скопска Црна Гора, додека институциите не успеваат навремено да реагираат. Потребни се координирани мерки, засилени контроли, поставување камери, осветлување и поефикасна соработка меѓу полицијата и локалното население.
Како можеме ние како граѓани кога ќе излеземе на улиците по Скопска Црна Гора или кога ќе излеземе на прошетка по планинските патеки скоро секогаш да сретнеме некое од возилата на дрвокрадците, а полицијата која е опремена со повеќе ресури, воедно и дронови со кои можат да снимаат е немоќна да ги улови?
Време е за конкретни чекори
Сите жители на Скопска Црна Гора заслужуваат мирен и безбеден живот. Да побараме:
- редовни полициски патроли на критичните делници;
- камери и осветлување на патиштата Чучер–Блаце и Бањани;
- брза реакција на пријави за нелегално сечење;
- јавна транспарентност околу запленетите возила и активности.
Нашата шума е наш кислород. Нашата улица е наш дом.
Да не дозволиме ниту шумата да исчезне, ниту некој живот да биде загубен поради нечија алчност.
