Нашата мисија отсекогаш била да споделуваме позитивни приказни, убавини од нашиот регион и вести што го зближуваат локалното население — не да навлегуваме во политика.
Сепак, како медиум кој секојдневно комуницира со граѓаните на Скопска Црна Гора, чувствуваме должност да ги поставиме прашањата што не засегаат сите нас.
Овие прашања произлегуваат од разговори со нашите соседи, пријатели и читатели — луѓе што живеат, работат и се грижат за овој крај. Затоа, со почит и објективност, ги упатувме идентичните прашања до двата кандидата за градоначалници на Општина Чучер-Сандево.
Во недостиг на официјални контакт е-мејл адреси, им испративме пораки преку нивните официјални Instagram профили, со единствена цел да ги добиеме нивните e-mail адреси и да можеме формално и транспарентно да им ги доставиме прашањата.
Прашања до кандидатите за градоначалници:
- Кои се вашите конкретни планови за решавање на проблемот со дивите депонии во регионот и нивното долгорочно спречување?
- Како планирате да пристапите кон уредување на дрвјата кои навлагаат во улиците, запуштените тротоари и јавните површини во населените места?
- Што мислите да преземете во однос на сечата на дрва и дивите дрвокрадци во планинскиот дел на Скопска Црна Гора?
- Планирате ли поставување на сообраќајни знаци и бележење на улиците? особено во селата каде прегледноста е отежната?
- Какви мерки ќе преземете за поправка и одржување на локалните патишта, особено во деловите каде има голем број дупки и оштетувања?
- Дали планирате активности за заштита на животната средина од загадување предизвикано особено од рудниците и индустриските активности во околината, и како ќе го следите тој процес?
- Какви мерки ќе преземете во врска со проблемот со уличните кучиња, со цел да се заштитат и граѓаните и животните, на хуман и системски начин?
- Како планирате да го подобрите секојдневното информирање и комуникација со жителите (на пример, преку месечни извештаи, јавни средби или дигитални канали)?
- Дали во вашиот план е вклучено развивање на туризмот во Скопска Црна Гора и во која насока можат граѓаните да очекуваат?
- Кое ќе биде вашето прво конкретно дело во првите три месеци од мандатот, доколку бидете (ре)избрани?
- Зошто граѓаните на Скопска Црна Гора треба да ви ја доверат довербата токму вам, а не на вашиот противкандидат?
- Би прифатиле ли јавно соочување со вашиот против кандидат?
Одговорите ке бидат објавени во целост и без измени, за граѓаните да можат рамноправно и објективно да се информираат.
Им благодариме однапред на кандидатите за одвоеното време и подготвеноста за отворен разговор.
Со почит тимот на СкопскаЦрнаГора.ком
