Општина Аеродром изрекла глоба од 1.000 евра за фирмата и 300 евра за управителот поради прекршување на Законот за јавна чистота.
– Поточно, при контрола на градилиште во близина на ПС Аеродром во Ново Лисиче, инспекторите утврдија дека возила со валкани гуми влегувале во сообраќај, со што се нарушува чистотата на околината и се прекршуваат законските одредби. Ваквите прекршоци не се дозволени и ќе се санкционираат строго и без исклучок – децидни се од Општината.
Оттаму додаваат дека во наредниот период, покрај редовните, ќе се вршат засилени контроли на сите активни градилишта.
– При контролите ќе се проверуваат: почитување на мерките за заштита на животната средина, преземање обврски за спречување загадување, одржување на јавната чистота на градилиштата и избегнување узурпација на јавни површини – објаснуваат од Општина Аеродром.
Притоа, апелираат до сите правни и физички лица да ги почитуваат законите и прописите бидејќи, како што нагласуваат, само така заеднички може да се обезбеди чиста, здрава и безбедна средина за сите жители.
